QƏRBİ AZƏRBAYCAN FOLKLORU ŞÖBƏSİ - Əziz Yusif oğlu Ələkbərov
![Əziz Yusif oğlu Ələkbərov](https://folklor.az/uploads/persons/dede_qorqud_shobesi/AZIZ-1.jpg)
(1960, Qərbi Azərbaycanın (indiki Ermənistanın) Vedi rayonunun Qaralar kəndi)
1979-1984-cü illərdə Azərbaycan Dövlət Universitetinin (indiki Bakı Dövlət Universitetinin) filologiya fakültəsində təhsil almışdır. 1984-1987-ci illərdə təyinatla Qax rayonunun Qum kənd orta məktəbində müəllim işləmişdir. Həmin illərdə həm də Qax rayon «Gürmük nəğmələri» Ədəbi Birliyinin sədri kimi ictimai vəzifə daşımışdır.
1987-ci ildə təyinat müddətini bitirib doğma Vedi rayonunun Qaralar kəndinə qayıtmış, lakin 1988-ci ilin payızında ailələri ilə birlikdə Ermənistan SSR-dən qaçqın düşərək Bakı şəhərində məskunlaşmışlar.
Ə.Ələkbərov 1988-ci ildən Azərbaycan Milli Elmlər Akademiyasının Nizami adına Ədəbiyyat İnstitutunda fəaliyyətə başlamış, baş laborant, kiçik elmi işçi, elmi işçi vəzifələrində çalışmışdır. 1992-ci ildə professor Yaşar Qarayevin rəhbərliyi ilə dissertasiya müdafiə edərək, filologiya elmləri namizədi alimlik dərəcəsi almış, 2004-cü ilin noyabrınadək həmin institutda böyük elmi işçi, bölmə müdiri vəzifələrində işləmişdir.
2000-ci ildən Azərbaycan Milli Elmlər Akademiyasının Folklor İnstitutunun (o vaxt Folklor Elmi-Mədəni Mərkəz) Redaksiya-Nəşriyyat şöbəsinin müdiri kimi fəaliyyət göstərmişdir. Dəfələrlə respublika, eləcə də beynəlxalq elmi konfrans və simpoziumlarda məruzələrlə çıxış etmişdir.
Ə.Ələkbərov 1991-1998-ci illərdə mətbuatda çalışmış, müxtəlif qəzetlərdə müxbir, şöbə müdiri, məsul katib, redaktor, baş redaktor müavini işləmişdir. 1993-1994-cü illərdə “Ana Vətən”, 1997-1998-ci illərdə “Ağrıdağ” qəzetinin baş redaktoru olmuşdur. 1996-1997-ci illərdə “Xalq qəzeti”nin Ədəbiyyat və incəsənət şöbəsinə rəhbərlik etmişdir. Azərbaycan Yazıçılar Birliyinin və Azərbaycan Jurnalistlər Birliyinin üzvüdür. Mətbuatda xidmətlərinə görə “Qızıl qələm”, “Həsən bəy Zərdabi” və bir sıra media mükafatlarına layiq görülmüşdür.
Ə.Ələkbərov 500-dən çox elmi və publisistik məqalənin, 38 müəllif və tərtib kitabının, o cümlədən “Qərbi Azərbaycan” adlı 10 cildlik ensiklopedik nəşrin, beş dildə – Azərbaycan, ingilis, rus, alman və fransız dillərində çap olunmuş “Qərbi Azərbaycan abidələri” adlı kitabın müəllifidir. “Qədim Türk-Oğuz yurdu – “Ermənistan” kitabı 2009-cu ildə Türkiyədə kütləvi tirajla təkrar nəşr edilmişdir.
Ə.Ələkbərov respublikada yaradılan ilk özəl nəşriyyatlardan birinin – 1997-ci ildən fəaliyyət göstərən “Ağrıdağ” nəşriyyatının yaradıcısı və direktorudur. 10-larla kitabın redaktoru, ön sözünün müəllifi, 100-lərlə kitabın naşiridir. Hazırda Azərbaycan Qaçqınlar Cəmiyyətinin sədridir.
2023-cü ildən AMEA Folklor İnstitutu Qərbi Azərbaycan folkloru şöbəsinin müdiridir.
ƏSAS KİTABLARI:
- Qədim Türk-Oğuz yurdu "Ermənistan". Bakı: Sabah. 1994.
- Abbasqulu bəy Şadlinski. Bakı, Sabah. 1996.
- Dramaturgiyada sənətkarlıq axtarışları. Bakı: Ağrıdağ. 1997.
- "Abşeron şəhidləri". Bakı, "Ağrıdağ", 1997.
- Qərbi Azərbaycan, I cild, Vedibasar mahalı. Bakı: Ağrıdağ. 2000.
- Qərbi Azərbaycan, II cild. (Zəngibasar, Gərnibasar və Qırxbulaq mahalları). Bakı: Ağrıdağ, 2002.
- Qərbi Azərbaycan, I cild, Vedibasar mahalı, (2-ci nəşri). Bakı: Ağrıdağ. 2003.
- Azərbaycan Folkloru Antologiyası, X kitab, İrəvan Çuxuru folkloru. Bakı: Nurlan, 2004.
- Qərbi Azərbaycan abidələri (Azərbaycan və ingilis dillərində). Bakı: Ağrıdağ. 2006.
- Azərbaycan Folkloru Antologiyası, XV kitab, Dərələyəz folkloru. Bakı: Nurlan, 2006.
- Qərbi Azərbaycan abidələri, 2-ci nəşri (Azərbaycan dilində), Bakı: Nurlan. 2007.
- Qərbi Azərbaycan abidələri, 2-ci nəşri (rus dilində). Bakı, Nurlan. 2007.
- Qərbi Azərbaycan abidələri, 2-ci nəşri (ingilis dilində). Bakı: Nurlan. 2007.
- Qərbi Azərbaycan abidələri, 2-ci nəşri (fransız dilində), Bakı: Nurlan. 2007.
- Qərbi Azərbaycan abidələri, 2-ci nəşri (alman dilində). Bakı: Nurlan. 2007.
- Qərbi Azərbaycanlıların 1988-ci il soyqırımı: sənədlərin dili ilə. Bakı: Nurlan, 2008.
- Qax: folklor-etnoqrafik etüdlər. Bakı: Nurlan. 2008.
- Qərbi Azərbaycanın dialektoloji lüğəti, 1-ci cild. Bakı: Nurlan. 2009.
- Azərbaycan Folkloru Antologiyası, XIX kitab, Zəngəzur folkloru. Bakı: Nurlan, 2009.
- Qürbət folkloru. Bakı: Nurlan, 2009.
- Kadim Türk-Oğuz Yurdu "Ermenistan". İstanbul: 2009.
- Türk mənşəli erməni soyadları. Bakı, Nurlan. 2011.
- Azərbaycan Folkloru Antologiyası, XX kitab, Loru-Pəmbək folkloru. Bakı, Nurlan, 2011.
- Azərbaycan Folkloru Antologiyası, XXI kitab, Qazax folkloru. Bakı: Nurlan, 2012.
- Azərbaycan Folkloru Antologiyası, XXIII kitab, Naxçıvan folkloru. Bakı: Nurlan, 2013.
- Quba-Şabran folklor örnəkləri, I kitab. Bakı: Nurlan, 2013.