Tacikistanda nəşr olunan "Friendship of People" beynəlxalq jurnalının 2026-cı il 4-cü nömrəsində filologiya elmləri doktoru, professor Ramazan Qafarlının 75 illik yubileyinə həsr olunmuş xüsusi təqdimat dərc edilib. Təqdim olunan material yalnız yubiley təbriki deyil, eyni zamanda alimin elmi və yaradıcılıq fəaliyyətini beynəlxalq oxucu auditoriyasına tanıdan bioqrafik təqdimat xarakteri daşıyır.

Jurnalda professor Ramazan Qafarlı Azərbaycan folklorşünaslığının görkəmli nümayəndələrindən biri kimi təqdim olunur. Materialda onun uzun illər Azərbaycan Milli Elmlər Akademiyasında səmərəli elmi fəaliyyət göstərdiyi, AMEA Folklor İnstitutunun "Dədə Qorqud" şöbəsinə rəhbərlik etdiyi, həmçinin ali təhsil müəssisələrində professor kimi çalışdığı qeyd edilir.

Təqdimatda alimin zəngin elmi yaradıcılığı geniş şəkildə işıqlandırılır. Xüsusilə "Mif və nağıl. Epik ənənədə janrlararası əlaqə", "Azərbaycan türklərinin mifologiyası", "Mifologiya", "Ritual-mifoloji rekonstruksiya problemləri", "Zaman poetikası" və digər fundamental monoqrafiyaları sadalanır, bu əsərlərin Azərbaycan folklorşünaslığının nəzəri əsaslarının formalaşmasına mühüm töhfə verdiyi vurğulanır.

Materialda professor Ramazan Qafarlının folklor nümunələrinin toplanması, nəşrə hazırlanması və elmi tədqiqi istiqamətindəki xidmətləri də xüsusi qeyd olunur. Onun yüzlərlə elmi məqalənin, dərslik və dərs vəsaitinin müəllifi olduğu, elmi redaktor kimi də məhsuldar fəaliyyət göstərdiyi diqqətə çatdırılır.

Təqdimatda alimin mədəni fəaliyyətinə də yer ayrılıb. Professor Ramazan Qafarlının ssenari müəllifi olduğu sənədli və bədii filmlər, "Xəmsə" qəzeti ilə əməkdaşlığı, müxtəlif mədəni layihələrdə iştirakı, "Dədə Qorqud" elmi jurnalının baş redaktoru kimi fəaliyyəti və folklor-mifologiya sahəsində yaratdığı "Mifologiya.az" internet platforması haqqında məlumat verilir.

Jurnalda professorun beynəlxalq elmi nüfuzu da xüsusi vurğulanır. Bildirilir ki, o, 2023-cü ildə Türkiyədə keçirilmiş beynəlxalq konfrans çərçivəsində "Türkiyə Cümhuriyyəti Başarı Ödülü" ilə təltif olunub, 2025-ci ildə isə Azərbaycan Prezidenti tərəfindən "Tərəqqi" medalı ilə mükafatlandırılıb. Bu faktlar alimin elmi fəaliyyətinə verilən yüksək qiymətin göstəricisi kimi təqdim edilir.

Jurnalda professor Ramazan Qafarlının 75 illik yubileyi münasibətilə ünvanlanmış təbrik mətni də yer alıb. Təbrikdə alimə möhkəm cansağlığı, uzun ömür, yeni elmi nailiyyətlər və Azərbaycan elminə xidmət yolunda uğurlar arzulanır, onun Azərbaycan mədəniyyəti və folklorşünaslığı qarşısındakı xidmətləri yüksək dəyərləndirilir.

Professor Ramazan Qafarlının 75 illik yubileyinin Tacikistanda nəşr olunan beynəlxalq jurnalda xüsusi təqdimatla işıqlandırılması Azərbaycan elminə, milli folklorşünaslıq məktəbinə və alimin zəngin elmi irsinə göstərilən beynəlxalq ehtiramın növbəti ifadəsi kimi qiymətləndirilə bilər.