“Folklorşünasın səsi” layihəsinin növbəti buraxılışı yayımlanıb. Buraxılışın qonağı AMEA Folklor İnstitutunun “Dədə Qorqud” şöbəsinin müdiri, filologiya elmləri doktoru, professor Ramazan Qafarlı olub. Ramazan Qafarlı çıxışında “Azərbaycan-türk eposu müasir elmi düşüncədə: “Dədə Qorqud”, “Koroğlu” və eşq dastanları” mövzusundan bəhs edib. Alim Azərbaycan-türk epik ənənəsinin xalqın tarixi yaddaşını, dünyagörüşünü və mənəvi dəyərlərini yaşadan mühüm mədəni irs olduğunu vurğulayıb. O bildirib ki, “Dədə Qorqud”, “Koroğlu” və eşq dastanları yalnız bədii mətnlər deyil, həm də cəmiyyətin etik normalarını, qəhrəmanlıq ideallarını və sosial düşüncə modelini nəsildən-nəslə ötürən mühüm epik strukturlardır.