Yanvarın 17-də AMEA-nın Folklor İnstitutunda 20 Yanvar faciəsinin 30-cu ildönümünə həsr olunan anım tədbiri keçirilib. Öncə şəhidlərin əziz xatirəsi bir dəqiqəlik sükutla yad edilib. Tədbirdə institutun direktoru, akademik Muxtar Kazımoğlu-İmanov çıxış edərək 20 Yanvar faciəsinin şahidi kimi, həmin günlərdə baş verən prosesləri diqqətə çatdırıb, faciənin yaranma səbəbləri və qanlı Yanvarda törədilən dəhşətlər haqqında ətraflı məlumat verib. O, Azərbaycan xalqının öz azadlığı və müstəqilliyi uğrunda tarix boyu qurbanlar verdiyini xatırladıb. 20 Yanvar qurbanlarının xatirəsinin əbədi yaşayacağını, xalqının azadlığı uğrunda şəhid olan insanların heç vaxt unudulmayacağını bildirib.
Sonra Folklor İnstitunun nəzdində fəaliyyət göstərən Folklor studiyasının 20 Yanvar faciəsi ilə bağlı hazırladığı video çarx izlənilib.

Folklor İnstitutunun Təhsil şöbəsinin müdiri, fil.ü. e.d., dos. Nizami Muradoğlu çıxışında 20 Yanvarın təkcə hüzn günü deyil, həm də qəhrəmanlıq, əyilməzlik, şərəf və ləyaqət günü olduğunu vurğulayıb, müstəqillik yolunun məhz 20 Yanvardan başladığını nəzərə çatdırıb, hər bir Azərbaycan vətəndaşını müstəqilliyimizin qədrini bilməyə, onu qoruyub saxlamağa çağırıb. Çıxışının sonunda o, 20 Yanvar şəhidlərinə həsr olunmuş “Sizi çağırıram” şeirini oxuyub.
“20 Yanvar cəmiyyəti”nin üzvü Akif Nəsirov cəmiyyətin fəaliyyətindən və faciə qurbanları ilə bağlı məqamların araşdırılıb təbliğ olunmasından söz açıb.
“Mərasim folkloru” şöbəsinin müdiri, fil.ü.f.d., dos. Ağaverdi Xəlil çıxışında bildirib ki, 20 Yanvar şəhidlərinin əziz xatirəsini anmaq hər bir Azərbaycan vətəndaşının borcudur.
“Folklor və yazılı ədəbiyyat” şöbəsinin aparıcı elmi işçisi, fil.ü. e.d. İslam Sadıq çıxışında bu qanlı hadisələrin canlı şahidi olduğunu vurğulayıb. 30 il keçməsinə baxmayaraq bu müdhiş hadisənin onun qəlbində dərin iz buraxdığını bildirib, 20 Yanvar şəhidlərinin xatirəsinə yazdığı “Ağlama, qərənfil, ağlama” şeirini oxuyub.