Türkiyənin məşhur “Kültür Evreni” dərgisində AMEA Folklor İnstitutunun Cənubi Azərbaycan folkloru şöbəsinin böyük elmi işçisi, fil.ü.f.d.Qiymət Məhərrəmlinin elmi məqaləsi çap olunub. Araşdırma yazısında tanınmış tədqiqatçı-alim Əli Şamilin “Qaşqaylar və onların folkloru” kitabından bəhs edilir. ““Qaşqay Türkləri və Onların Folkloru” Kitabının İncələməsi” adlı yazıda Əli Şamilin Qaşqay türklərinin həyat və fəaliyyəti, yaşadıqları tarixi yerlər, bu türk toplumunun müasir dövrümüzdəki problem və qayğıları, milli-mənəvi dəyərlərinin qorunub-saxlanması, inkişafı sahəsindəki çabaları barədəki təəssüratları, aparılan araşdırmaların təhlili məsələləri önə çəkilmişdir. Qiymət Məhərrəmli Əli Şamilin qənaətlərinə əsaslanaraq qeyd edir ki, öz mübarizliyi, əzmkarlığı, şücaətləri ilə seçilən Qaşqaylar əsas etibarilə İranın güney ərazilərində, xüsusilə Fars ostanında və onun ətrafında yaşayırlar. Lakin Qaşqay türklərinin nümayəndələri öz qədim dil, ləhcə, adət-ənənə, folklor, ailə-məişət, mərasim qayda-qanunlarını qoruyub-saxlasalar da, cəmiyyətə inteqrasiya, fars millətinə assimilyasiya olunmaları nəticəsində Qaşqaylığın mühüm xarakterik xüsusiyyət və göstəricilərini tədricən unudanlar, öz ana dilindən əl götürənlər də az olmamışdır. Bununla belə, həmin qəbildən olan Qaşqaylar da öz milli kimliyini unutmur, Qaşqay olduqları ilə qürurlanırlar. Bütün bunlar haqqında məlumatı biz “Qaşqaylar və onların folkloru” kitabından əldə edirik. Kitab yaşadığımız ötən il nəşr olunsa da, buradakı hər hadisə, hər fakt Qaşqay türklərinin qəhrəmanlıqla səciyyələnən şanlı tarixi, folklor və mədəniyyəti, həyat tərzi, ailə və məişət gələnəkləri ilə bağlı tədqiqatçının uzun illər ərzində beynində toparlayaraq hazırlayıb həyata keçirməyə çalışdığı, təxəyyül və təfəkkür süzgəcindən keçirərək meydana çıxardığı mükəmməl tədqiqat əsəri kimi elmi ictimaiyyətin diqqətini cəlb etməkdədir. İnanırıq ki, Qaşqay türklərinin öz doğma Türk dünyasına yenidən və layiqincə təqdim olunması yolunda yorulmaz tədqiqatçı-alimimiz Əli Şamilin “Qaşqaylar və onların folkloru” adlı mükəmməl araşdırmasının müstəsna rolu olacaqdır.