16 noyabr 2021-ci il tarixində Ankara Universiteti Çağdaş türk ləhcələri və ədəbiyyatları bölümünün doktoru, “Varlıq” dərgisinin baş redaktoru Məhəmməd Rıza Heyət AMEA Folklor İnstitutunun qonağı olub. İnstitutun direktoru, akademik Muxtar Kazımoğlu-İmanov qonağı səmimi qarşılayaraq onu ölkəmizdə görməkdən məmnun olduğunu bildirib və institutda görülən işlər barədə məlumat verib.
Dr. M.R.Heyət görüş üçün təşəkkürünü bildirərək ziyarətinin əsas məqsədinin “Varlıq” dərgisinin yeni saylarını instituta təqdim etmək və institutla əməkdaşlıq əlaqələrini gücləndirmək olduğunu bildirib. Qonaq söhbət zamanı 1979-cu ildən nəşr edilən dərgi barədə geniş məlumat verib. O, dərginin 2015-ci ildən, prof. Cavad Heyətin vəfatından sonra Ankarada əvvəlki kimi ərəb əlifbası ilə elmi jurnal kimi yayımlandığını diqqətə çatdırıb. Alim Türkiyə, Azərbaycan və İrandan 40-a qədər sayılıb-seçilən elm adamının bu dərginin redaksiya heyətində yer aldığını qeyd edib.

İnstitutun rəhbəri akademik M.Kazımoğlu-İmanov görüş zamanı “Varlıq” dərgisinin redaksiya heyətində yer almaqdan məmnunluğunu bildirərək özünün və rəhbərlik etdiyi qurumun əməkdaşlarının bu dərgi ilə əməkdaşlığının genişləndiriləcəyini bildirib.
Sonra qonağa Folklor İnstitutunda fəaliyyət göstərən Cənubi Azərbaycan folkloru şöbəsinin fəaliyyəti və Cənubi Azərbaycanın folkloru ilə bağlı nəşr olunan on bir cildlik kitab barərədə məlumat verilib. Görüş zamanı Dr. Məhəmməd Rıza Heyət sözügedən çoxcildliyin tanıtımı ilə bağlı Ankarada Folklor İnstitutu ilə ortaq tədbirin keçirilməsini təklif edib. O, eyni zamanda İsfahanda yaşayan türklərlə, eləcə də qaşqaylarla bağlı folklor materiallarının instituta təqdim edəcəyini bildirib. Akademik M.Kazımoğlu-İmanov qonağa təşəkkür edib və qarşılıqlı əməkdaşlığa hər zaman hazır olduğunu qeyd edib.
Görüşün sonunda Dr. M.R.Heyətə Güney Azərbaycan folkloru seriyasının nəşrləri və disklər tədqim edilərək xatirə şəkilləri çəkilib.